ಮೇ ಫ್ಲವರಿನ ಮರ

ಮೇ ಫ್ಲವರ್ ಮರಗಳ
ಸಾಲಿನ ಕೆಳಗೆ,
ಹಳೆಯ ಒಣಗಿದ ಹೂ ರಾಶಿ
ಸಣ್ಣನೆಲೆಗಳ ತರಗೆಲೆ ಪದರ
ಹಾಸಿಕೊಂಡಿವೆ.
ಈ ಬೀದಿ ಎಲ್ಲೋ ಮೂಲೆಯಲ್ಲಿದೆ,
ಯಾರೂ ಇದನ್ನ ಗುಡಿಸಲು ಬರುವುದಿಲ್ಲ.

ಮರದ ಕೆಲ ಗೆಲ್ಲುಗಳಲಿನ್ನೂ,
ಹೂ ಗೊಂಚಲುಳಿದಿವೆ,
ಕೆಂಪು ಕೆಂಪು.
ಗಾಳಿಗೊಂದೊಂದು ಹೂ ಪಕಳೆ
ಅಲ್ಲೆ ತೇಲುತ್ತ ಕೆಳಬೀಳುತ್ತವೆ.
ಈ ಬೀದಿ ಎಲ್ಲೋ ಮೂಲೆಯಲ್ಲಿದೆ,
ಯಾರು ಇದನ್ನ ನೋಡಲು ಬರುವುದಿಲ್ಲ.

ಮಳೆಗಾಲ ಶುರುವಾಗಿದ್ದರಿಂದ,
ಸಾಲು ಮರಗಳ ತುಂಬ ಹಸಿರ ಲವಲವಿಕೆ;
ಮಳೆ ನಿಂತ ಮೇಲೆ ಇಲ್ಲಿ
ನಡೆಯುವುದೆಂದರೆ ಬಹಳ ಖುಷಿ.
ನೀರು ತೊಟ್ಟಿಕ್ಕುತ್ತದೆ, ಹನಿ-ಹನಿಯಾಗಿ.
ಈ ಬೀದಿ ಮೂಲೆಯಲ್ಲಿದೆ
ಯಾರೂ ಈ ಸುಖ ಅನುಭವಿಸಲು ಬರುವುದಿಲ್ಲ.

ಮೇ ಫ್ಲವರಿನ ಮರ ಎಷ್ಟೇ ಚಂದ
ಕಂಡರೂ,
ಮಳೆಗಾಲದಲ್ಲದು ಹೂ ಬಿಡುವುದಿಲ್ಲ.
ಭಣಗುಡುವ ಬೇಸಗೆಯೇ ಬೇಕದಕೆ.
ಹೂ ಬಿಟ್ಟಾಗಲೂ ಅಷ್ಟೇ,
ಯಾರು ಅದರ ಚಂದ ಹೊಗಳುವುದಿಲ್ಲ.
ಈ ಬೀದಿ, ಮೂಲೆಯಲ್ಲಿದೆ.