ಶುಕ್ರವಾರ, ಜನವರಿ 14, 2011

ಸಂಕ್ರಮಣದ ಹೊತ್ತು

ಆಫೀಸಿಂದ ಹೊರಟರೆ
ಅಚಾನಕ್ಕಾಗಿ ಮದುವೆ ಗೊತ್ತಾದ
ಹೆಣ್ಣಿನ ಹಾಗೆ
ರಸ್ತೆಗಳ ಚಹರೆಯೇ ಬದಲು.
ಫುಟ್ ಪಾತುಗಳ ಮೇಲೆ ಕಬ್ಬು,
ಹೂ ರಾಶಿ ..ಯಾರಿಗೆ ಏನು ಬೇಕೋ ಏನೋ
ಎಲ್ಲೆಡೆ ಚೌಕಾಸಿ

ಬೈಕು ಸರ್ವೀಸಿಗೆ ಬಿಡಲು
ಹೊತ್ತು,
ಅಥವ ಹೊಸದೆ ಕೊಂಡರೆ ಹೇಗೆ?
ಈ ಬಾರಿ
ಸ್ಯಾಲರಿ ಹೈಕಿಲ್ಲ
ಅಂತ ಸುದ್ದಿ

ಅಮ್ಮನ ಕಳಕಳಿಯ ಫೋನು
ನಾಳೆ ರಜೆ, ಹೊರಟು
ಬನ್ನಿ ಊರಿಗೆ
ಸಂಕ್ರಾಂತಿಗೆ
ಪಾಯಸ , ಹೋಳಿಗೆ ವಿಶೇಷ
ಇಲ್ಲಿಯವರೆಗೆ ಮನೆಯಲ್ಲಿ
ಅದನ್ನ ಹೀಗೆಲ್ಲ ಆಚರಿಸಿದ್ದು
ನೆನಪಿಲ್ಲ

ಮನೆಗೆ ಬಂದರೆ
ಹೆಂಡತಿಯ ಮನವಿ
ಇನ್ನಾದರೂ ಖರ್ಚು ಲೆಕ್ಕವಿಡು
ಅದೂ ಇದೂ ಅಂತ
ಉಡಾಯಿಸೋದು ಬಿಡು

ನಾಳೆ
ಗೆಳೆಯನೊಬ್ಬ ಹೊಸ ಬಾಡಿಗೆ ಮನೆಗೆ
ಹೊರಟಿದ್ದಾನೆ


ಇದು ಸಂಕ್ರಮಣದ ಹೊತ್ತು..