ಮಳೆಯಲಿ ನೆನೆಯುವ ಮಜವೇ ಬೇರೆ...

ಮಳೆಯಲಿ ನೆನೆಯುವ ಮಜವೇ ಬೇರೆ, ಗಾಂಧಿಬಜಾರೊಳಗೆ!
ಅವಳಲ್ಲಿದ್ದರು ನೆನೆವಳು ಇಲ್ಲಿ ನನ್ನಯ ಜೊತೆ ಜೊತೆಗೇ.
ವಾಹನಸಾಲು ಓಡುತ್ತಿದ್ದರೂ, ಕೇಳದು ಅವುಗಳ ಶಬ್ದ,
ಮತ್ತೆ ಮತ್ತೆ ಮನದೊಳಗೆ, ಏನೇನೋ ಗುಣಲಬ್ಧ.

ಹೂವ ಮಾರುವ, ಹಣ್ಣ ಕೊಳ್ಳುವ ಎಲ್ಲರು ನೋಡಲು ಖುಷಿಯೇ.
ಹೊರಗಡೆಯೆಲ್ಲ ಒದ್ದೆಯಾದರೂ, ಮನವದು ಮಾತ್ರ ಬಿಸಿಯೇ.
ದೇವರ ಪೂಜೆಯ ಅಂಗಡಿಯೊಳಗೆ ಅರಸಿನ ಕುಂಕುಮ ಗೋಪುರವು
ಮಳೆಹನಿ ತಟ ಪಟ ಅನ್ನುತಲಿದ್ದರೆ, ನೆನಪಲಿ ಅವಳಾ ನೂಪುರವು.

ಯಾರಿಗು ಇಲ್ಲಿ ಆತುರವಿಲ್ಲ, ಮಳೆ ಹೊಡೆತದ ಭಯವಿಲ್ಲ,
ಏನಿವರೆಲ್ಲರು ಪ್ರೇಮಿಗಳೇನೇ?, ನನಗದು ತಿಳಿದಿಲ್ಲ.
ರಸ್ತೆಯಂಚಿನಾ ಹೋಟೇಲೊಳಗೆ ಕಾಫಿಯ ಪರಿಮಳವು,
ಯಾಕಿವಳಿಲ್ಲ ನನ್ನ ಜೊತೆ, ಸಣ್ಣಗೆ ಏಕೋ ತಳಮಳವು.

ಮರಸಾಲಿನ ಅಡಿ ನಡೆಯುತಲಿದ್ದರೆ, ನೀರ ಧಾರೆಯೊಳಗೆ
ಬರುವಳು ಅವಳೂ ನನ್ನ ಜತೆ, ನೆನಪ ದಾರಿಯೊಳಗೆ.
ಮಳೆಯಲಿ ನೆನೆಯುವ ಮಜವೇ ಬೇರೆ, ಗಾಂಧಿ ಬಜಾರೊಳಗೆ
ಪ್ರೀತಿಯೊಳಿದ್ದರೆ ಒಮ್ಮೆ ಬಂದು ಬಿಡಿ, ಮಳೆ ಕಳೆವುದರೊಳಗೆ!